Bugun Oliy va o‘rta maxsus ta’lim vazirligida markaziy apparat mas’ullari, 130 dan ortiq oliy ta’lim muassasasi rahbarlari va prorektorlari ishtirokida kengaytirilgan videoselektor yig‘ilishi bo‘lib o‘tdi. Vazir Abduqodir Toshqulov olib borgan yig‘ilishda oliy ta’lim muassasalarida yangi o‘quv yilining ikki kunida yo‘l qo‘yilgan kamchiliklar tanqidiy muhokama qilindi.
Dastlab, vazir yurtimiz mustaqilligining o‘ttiz bir yilligi munosabati bilan mukofotlangan 16 nafar oliy ta’lim fidoyilarini samimiy tabrikladi.
Yig‘ilishda kun tartibidagi birinchi masala – yangi o‘quv yili uchun talabalarni kutib olish, dars jarayonlarini tashkil etish, o‘quv binolari va xonalar tayyorligi holati 98 foiz oliy ta’lim muassasalarida ko‘ngildagidek tashkil etilgani ta’kidlandi.
Qayd etilganidek, kuni kecha barcha OTM tomonidan talabalar bayramona kutib olinib, dars jarayonlari tasdiqlangan jadvallar asosida boshlandi.
Yig‘ilishda shuningdek, talabalarni yotoqxona va aholi xonadonlariga ijara asosida joylashtirish bo‘yicha 2 kun davomida OTMda olib borilgan ishlar ham sarhisob qilindi.
Jumladan, kunduzgi ta’lim shaklida talabalar turar joylari mavjud OTMda jami 477 ming 388 nafar talaba tahsil olmoqda. Shundan 83 ming 672 nafarini TTJga joylashtirish belgilangan. Ayni paytda respublika bo‘yicha jami 26009 nafar talaba yotoqxonaga joylashtirildi. Bu jami TTJga joylashtirilishi rejalashtirilgan talabalarning 31 foizini tashkil etmoqda. Respublika bo‘yicha 48 ming 309 nafar (shundan, Toshkent shahri bo‘yicha 16779 nafar) talabalar ijara xonadonlariga joylashgan.
Bu esa jami ijaraga ehtiyoji bor talabalarning 41 foizini (Toshkent shahri bo‘yicha 37 foiz) tashkil etmoqda. Ammo shunga qaramay, Toshkent shahridagi ko‘pchilik talabalarning yotoqxona yoki ijaraga joylasha olmayotgani bilan bog‘liq muammolar saqlanib qolayotgani kun tartibidagi dolzarb masala bo‘ldi.
Ijtimoiy tarmoqlarda bildirilayotgan ayrim asossiz fikrlar haqida so‘zlab, galdagi vazifa oliy o‘quv yurtlaridagi ijtimoiy-ma’naviy ta’lim muhitini yanada yaxshilash, – dedi vazir.
Yig‘ilishda davlatimiz rahbari tomonidan imzolangan 2022–2026 yillarda innovatsion rivojlanish strategiyasini amalga oshirish bo‘yicha tashkiliy chora-tadbirlar haqidagi qaror ijrosini bajarish, xalqaro reytinglar bilan ishlash, ularning TOP-1000 talik va 500 talik o‘rinlaridan joy olish borasida yo‘l qo‘yilgan kamchiliklar tahliliy ko‘rsatib o‘tildi. Skopus tizimidagi ilmiy nashrlarda maqola e’lon qilishda yaxshi natijalarni qo‘lga kiritgan oliy ta’lim muassasalari alohida tilga olinib, o‘rnak sifatida ko‘rsatildi. O‘z o‘rnida, joriy yilda rejalashtirilgan dissertatsiya himoyalar sonining ham ko‘ngildagidek emasligi tanqid qilindi. Bugungi kunda oliy ta’lim dargohlarida 180 ga yaqin kengash bo‘lishiga qaramay joriy yilning 8 oyi davomida 888 ta ilmiy himoya (35 foizi) amalga oshirilgani tanqid ostiga olindi.
Yig‘ilishda akademik litseylar bitiruvchilarining OTMga o‘qishga kirish darajasi haqida ham so‘z bordi. Qayd etilganidek, 2021/2022 o‘quv yilida 65 ta akademik litseylarni jami 13 631 nafar o‘quvchi bitirdi. Shundan, 11 314 nafari oliy ta’lim muassasalariga o‘qishga qabul qilinib, dastlabki natijalarga ko‘ra, umumiy ko‘rsatkich 83% ni tashkil qildi.
Xususan, mazkur ko‘rsatkichlar 17 ta akademik litseyda 90% dan yuqori, 28 ta akademik litseyda 80% dan yuqori ekani aytildi.
Oliy ta’lim muassasalarida professor-o‘qituvchilarni ishga qabul qilish va ishdan bo‘shatish, qo‘shma ta’lim dasturlaridagi ayrim mavjud kamchiliklar ham sanab o‘tildi.
Yig‘ilishda shuningdek, avvallari tabaqalashtirilgan (super) to‘lov-kontrakt shartnomalarini olishdagi ta’magirliklar tilga olinib, joriy o‘quv yilidan boshlab bu ishlar ham raqamlashtirilgani haqida aytildi. kontrakt.edu.uz axborot tizimi ishga tushirilgan bo‘lib, talabalalikka qabul qilinganlar shartnomalarni mazkur platforma orqali elektron shaklda yuklab olishlari mumkin bo‘ladi. Yig‘ilishda mazkur platformadan foydalanish tartibi yangi o‘qishga qabul qilingan talaba va oliy ta’lim muassasasi mas’uli ishtirokida onlayn ko‘rsatib berildi.
