fbpx

Kattaqo‘rg‘on shahrini ijtimoiy-iqtisodiy rivojlantirish borasidagi ishlarning yana bir natijasi sifatida shaharda Samarqand davlat Universitetining Kattaqo‘rg‘on filiali ochilgan edi. Shahar hokimining tashabbusi bilan tashkil qilingan ushbu ta’lim muassasasida o‘tgan o‘quv yili davomida 703 nafar talaba tahsil oldi.

Hududda pedagogika, iqtisodiyot, transport logistikasi sohalarining rivojlanish istiqbollari va ustuvor vazifalarni hisobga olgan holda professional oliy ma’lumotli kadrlarni tayyorlashni o‘z oldiga maqsad qilgan ushbu filial joriy o‘quv yilida yana 400 dan ortiq talabalarni bag‘riga oldi.

Quvonarlisi filial ushbu o‘quv yilida o‘zining yangi binosiga ega bo‘ldi. Kapital ta’mirlash ishlari amalga oshirilgan yangi binoning bugun ochilish marosimi bo‘lib o‘tdi. Unda shahar hokimi Gavhar Alimova, sektor rahbarlari, jamoatchilik vakillari, filial o‘qituvchilari ishtirok etdilar.

Davlat madhiyasi bilan boshlangan tadbirda so‘z olgan shahar hokimi yig‘ilganlarni muborakbod etar ekan, ta’lim sohasidagi islohotlarning amaldagi natijasi sifatida bugun shaharda shunday dargohning tashkil qilingani kattaqo‘rg‘onlik ziyo ahliga ulkan quvonch bag‘ishlaganligini, kelgusida ushbu dargohdan shaharni, qolaversa mamlakatimizni yanada taraqqiy ettirishga munosib hissa qo‘shadigan bilimli va malakali yosh kadrlar yetishib chiqishiga tilak bildirdi.

Shundan so‘ng Samarqand Davlat universitetining ilmiy ishlar va innovasiyalar bo‘yicha prorektori Hakim Xushvaqtov so‘zga chiqdi.

U bugun barcha qulayliklarga ega bo‘lgan o‘quv binosining foydalanishga topshirilgani talaba-yoshlarning munosib ta’lim-tarbiya olishlari uchun katta imkoniyat ekanligini aytar ekan, bugun shaharda mana shunday oliy ta’lim dargohining ochilishi, yaratilgan shart-sharoitlarda shahar hokimining xizmati beqiyos ekanligini alohida ta’kidladi.

Shundan so‘ng tadbir ishtirokchilari binodagi shart-sharoitlar bilan tanishdilar.

Bino zamon talablari darajasida jihozlangan.

Shuningdek, hozirda talabalar uchun 500 o‘ringa mo‘ljallangan yotoqxona hamda 600 o‘rinli yangi o‘quv binosida ham qurilish ishlari amalga oshirilmoqda.