Barcha oliy ta’lim muassasalarida tyutorlar faoliyati yo‘lga qo’yilgan. Ular talabaning ta’lim olishidagi muammolar, ularning yashash tarzi, ijaradagi xonadon egasi shaxsiyati, talaba xavfsizligini ta’minlanganlik holatini o‘rganishmoqda.
Bu borada SamDU Kattaqo‘rg‘on filiali tyutorlari samarali faoliyat olib borishmoqda. Talaba ijarada yashayotgan xonadonlar yuqoridagi talablar asosida “Qizil”, “Sariq” va “Yashil” toifalarga ajratilib, o‘z vaqtida zarur choralar ko’rilmoqda.
Filialning pedagogika va tillarni o‘qitish fakulteti dekani o‘rinbosari J.Abdurahmonov, fakultet tyutorlari A.Jabborov hamda H.Rashidov talabalar xonadonida bo‘lib, toifalarga ajratmoqda. Talabaning dars tayyorlashi, yashashi uchun zarur sharoitlar mavjud bo‘lmagan taqdirda talabani talabalar turar joyi yoki boshqa ijara xonadoniga ko‘chirilmoqda.
— Ijarada yoki yotoqxonada yashayotgan har bir talabamiz ahvolidan xabardormiz, — deydi pedagogika va tillarni o‘qitish fakulteti tyutori Abror Jabborov. — Faoliyatimizni samarali tashkil qilish, talaba yashayotgan xonadonni qiyinchiliklarsiz, tezkor topib borish maqsadida har birining elektron manzili, ya’ni “geopozitsiya”si shakllantirildi. Bu ortiqcha sarsongarchilikning oldini olmoqda.
Bugungi o‘rganish natijalariga ko‘ra bir nafar talabaning ijara xonadoni “Qizil” toifali, deb topilib, u talabalar turar joyiga ko‘chirildi. Ushbu yo‘nalishdagi muhim vazifalar tizimli ravishda davom etmoqda.