Sog’lom turmush tarzini qo‘llab-quvvatlash va yoshlarning jismoniy faolligini oshirish maqsadida Samarqand davlat universiteti Kattaqo’rg’on filialida muntazam ravishda sport musobaqalari oʻtkazilib kelinmoqda.
Xususan, joriy yilning 28-mart kuni SamDU Kattaqo’rg’on filialida sport turlari bo’yicha jahon, Osiyo va respublika g’oliblari ishtirokida master klass o’tkazildi.
Ushbu tadbirda armresling bo’yicha Osiyo hamda O’zbekiston chempioni Shamshod To’xteyev, boks bo’yicha O’zbekiston chempioni Akbar Aminjonov, Kattaqo’rg’on shahar sport maktabi boks bo’yicha murabbiyi Toshinbek Meliyev, armresling bo’yicha murabbiy Muxammadali Nematullayev, filialning 2-bosqich talabasi, ashixara karate bo’yicha jahon chempioni Sh.Ergashov, kurash bo’yicha Osiyo chempioni M.Sunnatullayeva va O’zbekiston chempioni E.Dusmurodov hamda filial talabalari ishtirok etdi.
Tadbirni Yoshlar masalalari va ma’naviy-ma’rifiy ishlar bo’yicha direktor o’rinbosari Sh.Mustayev ochib berdi hamda tashrif buyurgan chempionlar bilan talabalarni tanishtirdi.
Uchrashuv qiziqarli kayfiyatda o‘tganini alohida ta’kidlash joiz. Talabalar chempionlarga o‘zlarini qiziqtirgan savollarini berib, ularning faoliyati, kelgusidagi rejalari haqida ko‘proq ma’lumotlarga ega bo‘ldilar.
Filial talabalari orasida sport tadbirlari oʻtkazish, ularning boʻsh vaqtini samarali oʻtkazish odat tusiga kirgan. Bu kabi uchrashuvlar tashkil qilinishi esa yoshlarni motivatsiyaga, oʻz oldiga qoʻygan maqsadi tomon intilishga undaydi.