2022 yil 29 dekabr kuni Prezidentimiz Shavkat Mirziyoev Xalqaro kongress markazida boshlang‘ich sinflar uchun ishlab chiqilgan yangi avlod darsliklari taqdimotida ishtirok etdi.
Samarqand davlat universiteti rektori, O‘zbekiston Respublikasi fan arbobi Rustam Xolmurodov mazkur yig‘ilishda mamlakatimiz rahbari tomonidan belgilangan vazifalar yuzasidan O‘zbekiston-Finlandiya pedagogika instituti professor-o‘qituvchilari bilan uchrashuv o‘tkazdi.
– Bugungi kunda ta’lim – mamlakat taraqqiyotining eng muhim poydevori hisoblanadi. Ta’limni rivojlantirish avvalo, pedagog-o‘qituvchilar zimmasidadir. Yanada aniqroq qilib aytadigan bo‘lsam, mamlakat taqdiri sizning qo‘lingizda, – deydi Samarqand davlat universiteti rektori, professor Rustam Xolmurodov. – O‘qitishda diplom muhim emas, balki sifat va salohiyat bosh maqsad bo‘lishi darkor. Imtihonlarda, o‘qish va o‘qitish faoliyatimizda xolis va adolatli bo‘lishimiz shart. Men takror aytaman, muallim talabaga 30 foizgacha bilim beradi, qolgan 70 foizini talaba mustaqil ta’limda oladi. Talabaning mustaqil ta’lim olishi uchun ham aslida pedagog-o‘qituvchi mas’ul. Ba’zan kasalni davolash uchun uning jonini og‘ritishga to‘g‘ri keladi. Siz misli shifokorsiz, bilim va ta’lim berib, uning ongini ochasiz, tafakkur olamini yoritasiz. Bu borada qattiqqo‘llik ham talabchanlik ham zarur. Kerak bo‘lsa mahalla, ota-ona bilan ishlang. Ularga ham mas’uliyat yuklang. Yaxshi o‘qigan talabaning mahallasiga, ota-onasiga tashakkurnoma yuboring, o‘qimagan talabani o‘zlashtirishi uchun harakat qiling. Chunki mamlakat kelajagi uchun barchamiz birdek mas’ulmiz. Ta’lim tizimida islohotni avvalo, o‘zimizdan boshlashimiz lozim. Zamon bilan hamnafas bo‘lmagan, o‘z ustida ishlamaydigan pedagog-o‘qituvchidan voz kechish vaqti allaqachon kelgan… Sifatli ta’lim bugunning eng muhim va dolzarb masalasiga aylandi. Sizlar O‘zbekiston-Finlandiya pedagogika instituti o‘qituvchilarisiz. Hozir-da mamlakat ta’lim tizmini Finlandiya tajribasi asosida qayta qurmoqchimiz. Qachon finlandiyalik mutaxassislar keladi, deb qarab turamizmi? Mutaxassislarni yuborish kerak. U yerdagi bog‘cha, maktab, kollej, institut tajribalarini o‘rgansin. O‘zbekistonga kelib amaliyotga tatbiq qilsin. O‘zbekiston-Finlandiya pedagogika instituti o‘rnak bo‘lishi kerak. Institutni tashkil qilishdan ham asosiy maqsad shu edi. Siz butun mamlakat pedagoglariga o‘rnak bo‘lib, ta’lim madaniyatini shakllantirishingiz zarur. Rivojlangan davlatlarda bakalavr diplomi bilan maktablarda dars berish mumkin emas, bunga yo‘l qo‘yilmaydi. Eng kamida magistr bo‘lishi kerak. Davlatimiz rahbari yangi o‘quv darsliklari taqdimotida qiz farzand va ayollarni o‘qitishga alohida e’tibor qaratish kerakligini alohida ta’kidladi: Bolalarni kim tarbiya qiladi? Albatta, ayollar. Shuning uchun biz qizlarimizni, onalarimizni o‘qitishimiz kerak. Shunda jamiyatni o‘qitgan bo‘lamiz”. Aynan shuni inobatga olgan holda Urgutda Samarqand davlat universiteti filiali ochilgan edi. Hozir filialning aksariyatini qiz bolalar tashkil qiladi…
– Samarqand davlat universiteti rektori Rustam Xolmurodov uchrashuvda, bugungi kunda dolzarb bo‘lgan ta’lim-tarbiya, pedagog mahorati borasida bizning oldimizga qo‘yilgan vazifalarni aniq va ravshan tushuntirdi, – deydi O‘zbekiston-Finlandiya pedagogika instituti o‘zbek tili va adabiyoti, ijtimoiy-gumanitar fanlar kafedrasi katta o‘qituvchisi Ozoda Anorqulova. – O‘qituvchining obro‘-e’tibori oshgani sayin uning zimmasiga yuklanayotgan vazifalar ham ortishi tabiiy hol. Endilikda, samarasiz faoliyatga chek qo‘yiladi. Bu fikrlar bugungi uchrashuvda ham takrorlandi. Haqiqatdan ham insonda fidoyilik, jamiyatda kechayotgan jarayonlarga dahldorlik hissi bo‘lmasa, hech bir bajarilgan ishdan natija chiqmaydi…
– 2023 yilning “Insonga e’tibor va sifatli ta’lim yili” deb e’lon qilinishi biz o‘qituvchilar uchun ham sharaf ham mas’uliyat, – deydi O‘zbekiston-Finlandiya pedagogika instituti tabiiy fanlar kafedrasi mudiri, dotsent Feruza Hamroyeva. -Sababi, barcha e’tibor, ta’limga, uning sifatiga qaratilmoqda. Bugun Samarqand davlat universiteti rektori Rustam Xolmurodov bilan uchrashuvda ham shu masalalar yuzasidan suhbatlashdik. Sifatli kadr tayyorlanishi bo‘yicha tavsiyalar berildi. Uchrashuvdan so‘ng o‘z oldimga bir qator rejalarni tuzib oldim. Pedagoglar barchamiz bir maqsad sari birlashib harakat qilsak, yuksak natijalarga erishamiz…
Behruz SHAMSIDDINOV
Samarqand davlat universiteti
Axborot xizmati xodimi,
Shavkat AKRAMOV olgan suratlar.