Bugun, 3-may kuni SamDU Kattaqo‘rg‘on filialida navbatdagi ota-onalar kongressi bo‘lib o‘tdi.
Filial hamda ota-onalar hamkorligini mustahkamlash eng asosiy maqsad etib belgilangan ushbu tadbirda bugun Aniq va tabiiy fanlar fakultetida ta’lim olayotgan talabalarining ota-onalari ishtirok etishdi.
Unda so‘zga chiqqan filial direktori Sh.Urakov ota-onalar filialimiz o‘quv jarayonlari, ma’naviy-ma’rifiy ishlar, yoshlar bilan ishlashdagi eng yaqin hamkorlar ekanligini e’tirof etdi. Ayni paytda bo‘lg‘usi pedagog kadrlar tayyorlashga yo‘naltirilgan filial faoliyatida ko‘zlangan yuqori natijalarga erishishda ota-onalar bilan mustahkam hamkorlik qilish muhim ekanligini qayd etdi. Zarur taklif va tavsiyalarga to‘xtalib, ota-onalarning murojaatlarini tingladi.
Shundan so’ng filial direktori Sh.Urakov tomonidan faol talabalarning ota-onalari “Tashakkurnoma” bilan taqdirlandi.
Qayd etish kerakki, yuqori saviyada ko‘rilgan tayyorgarlik hamda filial faoliyatini keng yoritib beruvchi ko‘rgazmalarning tashkil etilganligi ota-onalarda katta taassurot qoldirdi.
Kongress yakunida ota-onalar farzandlari tahsil olayotgan muassasada yaratilgan shart-sharoitlar, filial o’quv xonalari va talabalar turar joyi bilan tanishtirildi.