Hashar qadimdan o‘zbek xalqining turmushida alohida o‘ringa ega bo‘lib kelgan. Bunda ko‘pchilik bo‘lib obodonlashtirish va xo‘jalik ishlari bajariladi, atrof-muhit beg‘araz tartibga keltiriladi. Azaldan muhim ishlarning ko‘pchiligi jamoa bo‘lib hashar tashkil etish orqali amalga oshirilgan. Hashar xayrixohlik, o‘zaro mehr-oqibat kabi tushunchalarni o‘zida aks ettiradi.

Samarqand davlat universiteti Kattaqo‘rg‘on filiali Biznesni boshqarish va axborot texnologiyalari fakultetida  joriy yilning 30 aprel kuni O‘zbekiston Respublikasi Vazirlar Mahkamasining 26 apreldagi tegishli farmoyishi asosida «Mahalla obodligi – yurt farovonligi» shiori ostida umumxalq xayriya hashari o‘tkazildi.

Ushbu umumxalq xayriya hasharida fakultetning professor-o’qituvchilari, tyutorlari hamda tashabbuskor talabalari faol ishtirok etdilar.

Xayriya hashari davomida manzarali daraxtlar va gul ko‘chatlariga ishlov berildi hamda sug‘orildi. Daraxtlarga oqlash va butalash ishlari amalga oshirildi. Ariq va lotoklar tozalandi. Obodonlashtirish, ko‘kalamzorlashtirish ishlarida fakultet hududi atrofi turli xil chiqindilardan tozalandi.

Obodonlashtirish va ko’kalamzorlashtirish maqsadida o‘tkazilayotgan umumxalq xayriya hashari professor-o’qituvchilar, ayniqsa, talaba-yoshlar qalbida o‘zaro mehr-oqibat, Vatanga muhabbat tuyg‘ularini mustahkamlashda xayrli tadbir vazifasini o‘taydi.