Avvalroq xabar berganimizdek, shahrimizda faoliyat yuritayotgan SamDU Kattaqo‘rg‘on filialining yangi binosi tantanali ravishda ochilgan edi. Barcha qulayliklar yaratilgan, zamonaviy ko‘rinishda jihozlangan ushbu maskan bugun erta tongdan talabalar bilan gavjum bo‘ldi.
O‘quv mashg‘ulotlari boshlanishi munosabati bilan ushbu yangi binoda bo‘lib o‘tgan tadbirda shahar hokimi Gavhar Alimova ishtirok etdi.
Tadbir Davlatimiz madhiyasi bilan boshlandi.
Shundan so‘ng so‘z olgan shahar hokimi joriy o‘quv yilida talabalik baxtiga muyassar bo‘lgan talabalarni muborakbod etar ekan, kelgusida ushbu muassasadan nafaqat Kattaqo‘rg‘on shahrini, yurtimiz rivojiga munosib hissa qo‘shadigan yetuk mutaxassislar yetishib chiqishiga tilak bildirdi.
Tadbirda so‘z olgan ota-onalar hamda talabalar ham avvalo, mana shunday yaratilgan shart-sharoitlar uchun, bugun yoshlarni ta’lim-tarbiya olishlari uchun berilayotgan imkoniyatlar uchun o‘z minnatdorchiliklarini bildirdilar.
Shahar hokimi birinchi dars ya’ni, ma’naviy – ma’rifiy dars soati davomida talabalar bilan samimiy suhbat asnosida Mustaqillik hamda uning jamiyat rivoji va yurt taraqqiyoti yo‘lidagi ahamiyati haqida so‘z yuritdi.
Davlatimizda, shahrimizda yoshlarni qo‘llab-quvvatlash borasidagi islohotlar haqida, shuningdek, mana shunday talabalik davridan unumli foydalangan holda bilim va saviyalarini yanada oshirishlari lozimligini, buning uchun barcha sharoitlar yaratilganligini ta’kidladi.
Haqiqatdan ham bugun yoshlar uchun barcha imkoniyatlar muxayo. Faqat bundan unumli foydalanish lozim.
Ayni damda o‘quv bino yonida yana yangi talabalar turar joyi hamda o‘quv binosi qurilmoqda. Filialda bugungi kunda 13 ta kunduzgi va 1 ta sirtqi ta’lim shaklida 1110 nafar talaba tahsil olmoqda