Oliy ta’lim, fan va innovatsiyalar vazirining topshiriqlariga binoan barcha oliy ta’lim muassasalarida “Ota-onalar kongressi” o’tkazilishi belgilangan. Shu munosabat bilan, bugun SamDU Kattaqo‘rg‘on filialida mazkur tadbir bo’lib o’tdi.
Unda o’z farzandlari tahsil olayotgan oliygoh bilan yaqindan tanishish istagida bo’lgan ota-onalar ishtirok etishdi.
Tadbirda filial direktori Sh.Urakov so’zga chiqib filialda bo‘layotgan yangiliklar, amalga oshirilayotgan ishlar va kelgusidagi rejalar to‘g‘risida yig‘ilganlarga atroflicha ma’lumot berib, filial professor-o‘qituvchilari va talabalari tomonidan erishilgan yutuqlar haqida to‘xtalib o‘tdi.
Uchrashuvda oliy ta’limdagi islohotlar, erishilgan yutuqlar, talabalarga yaratilgan shart-sharoitlar, talabalarning darsdan bo’sh vaqtlarini mazmunli tashkil etishda olib borilayotgan ishlar,filial ichki-tartib qoidalari, kredit-modul tizimi haqida soʻz yuritildi.
Rahbariyat ota-onalardan talabalarning oʻqishi, yurish-turishi, qiziqishlaridan boxabar boʻlishlari, nazorat qilishlarini soʻradi. Darslarga o‘z vaqtida qatnashib, berilgan vazifalarni bajarishi muhimligi va bunda ota-onalar ham befarq bo‘lmasliklari tushuntirildi.
Shuningdek, talabalarning maʼnaviy-axloqiy holatiga salbiy taʼsir koʻrsatuvchi turli huquqbuzarlik va korrupsion holatlarni oldini olishda ota-onalar bilan hamkorlikda ishlash lozimligi haqida taʻkidlanib, ota-onalarning ham fikr-mulohazalari, takliflari tinglandi.
Shundan so’ng filial direktori Sh.Urakov tomonidan faol talabalarning ota-onalari “Tashakkurnoma” bilan taqdirlandi.
Qayd etish kerakki, yuqori saviyada ko‘rilgan tayyorgarlik hamda filial faoliyatini keng yoritib beruvchi ko‘rgazmalarning tashkil etilganligi ota-onalarda katta taassurot qoldirdi.
Kongress yakunida ota-onalar farzandlari tahsil olayotgan muassasada yaratilgan shart-sharoitlar, filial o’quv xonalari va talabalar turar joyi bilan tanishtirildi.