IJODIY MULOQOT VATANGA MUHABBATNI, KITOB MUTOLAASIGA MЕHRNI YUKSALTIRDI
O‘zbekiston Respublikasi Prezidenti Administratsiyasining 2024 yil 22 iyuldagi topshiriq xatiga asosan Oliy ta’lim, fan va innovatsiyalar vazirligi, O‘zbekiston Yozuvchilar uyushmasi va bir qator nufuzli davlat tashkilotlari bilan tashkil qilinib kelinayotgan “Ma’rifat ulashib” loyihasi bugun haqiqiy ma’noda ezgulik karvoniga aylandi.
Biz, SamDU Kattaqo‘rg‘on filialida 2024 yil 17 mayda ham ushbu loyiha asosida yirik tadbirlar o‘tkazdik! Taniqli jurnalist, shoir va adiblardan Mamatqul Hazratqulov, Maqsud Jonixonov, Zuxro Eshonqulovalar Kattaqo‘rg‘on mehmoni bo‘lib, talaba-yoshlarimiz qalbida unutilmas iliq tassurotlar qoldirib ketishgan edi.
Uchrashuv munosabati bilan ijodkorlar oliygoh hududida daraxt ko‘chatlari o‘tqazishdi. Filialning mahobatli binosini ko‘rib o‘z hayratlarini yashirishmadi. “Ma’rifat ulashib” loyihasi mehmoni, jurnalist va adib Maqsud Jonixonovning “Onamga 20 ming so‘m” nomli hikoyasi asosida qisqa film suratga olinib, e’tiboriga havola qilindi.
Ushbu uchrashuvlar haqida “Jamiyat” gazetasi muharriri Maqsud Jonixonov gazetaning 2024 yil 23 maydagi 22-sonida “Dillashuvga aylangan tashabbus” nomli maqolasida mana shunday iliq fikrlarni qoldirdi:
“Kattaqo‘rg‘onlik yigit-qizlarning jo‘shib, yonib, baralla o‘zlarini ko‘rsatishlari bejiz emas ekan. Eng avvalo, filialning mahobatli binosi shahar ko‘rkiga-ko‘rk qo‘shgan bo‘lsa, u yerdagi tamoman boshqacha sharoitdan ko‘z uzolmaysiz. Har bir audiyatoriya mukammal jihozlangan. Biror bir burchakda tashlandiq tugul, gard ham ko‘rmadik. Buning sababini aytishdi: Kattaqo‘rg‘on shahar hokimi Gavhar Alimova ozodalikni birinchi o‘ringa qo‘yarkan va boshqalardan ham shuni talab qilarkan. Juda odil va oqil talab. Mana nima uchun Prezidentimiz ayollardan rahbar ko‘proq bo‘lishini istaydilar. Ayol o‘zi nazokat va malohat sohibasi bo‘lish bilan birga, har bir yumushga mas’uliyat bilan yondoshadi…
SamDU Kattaqo‘rg‘on filiali direktorining ma’naviyat ishlari bo‘yicha o‘rinbosari Shomurod Mustafoyev g‘oyasi va tashabbusi bilan ijodkor yoshlarning sahna ko‘rinishlarini tomosha qilib, Bahodir Yo‘ldoshevdek atoqli rejissyor, Majidiy nomidagi teatrning dovrug‘i bejiz emasligiga iqror bo‘ldik. Talabalarning taniqli ijodkorlar asarlaridan ilhomlanib, “Halovat”, “Cho‘li iroq”, “Onamga yigirma ming so‘m” kabi hikoyalarni sahnalashtirgani, va, hatto qisqa metrajli kino ishlashganiga qoyil qoldik. Qizlar sahnaga chiqib she’r o‘qiganda faxrlandik.
2024 yil 18-oktyabr kuni bo‘lib o‘tgan “Ma’rifat ulashib” loyihasining navbatdagi tadbirini ham filialimizda ko‘tarinki kayfiyatda o‘tkazishga harakat qildik!
Bir necha oy oldindan bizga tashrif buyurishi kutilgan ijodkorlarimiz Aziz Said, Dilshod Rajab, Orif To‘xtash haqida talabalarimiz, Kattaqo‘rg‘on tumanidagi hamkor maktablarimizga keng ma’lumot berdik. Ularning ijodiy faoliyatiga doir “Zakovat” intellektual o‘yinlarini, insholar tanlovlarini tashkil qildik. Ijodkor yoshlarimiz shoirlarimizning asarlari asosida sahna ko‘rinishlari tayyorlashdi, ularning she’rlari bilan qo‘shiqlar kuylashdi.
Biz imkoniyatimiz doirasida Samarqand farzandi Orif To‘xtash yashagan mahalla va o‘qigan maktabda bo‘lib, lavha tayyorladik. Ularning erishgan muvaffaqiyatlarini farzandlarimizga, talabalarimizga ibrat sifatida ko‘rsatishga harakat qildik.
Uchrashuv nihoyatda qizg‘in kechdi. Shoirlarimiz o‘z ijod namunalarini yetkazibgina qolmay, talabalarimiz, borgan maktablarida o‘quvchilarimiz qalbiga Ona Vatanga muhabbat va sadoqatni, adabiyotga, kitob mutolaasiga mehrni qadashdi. Endigina she’rlarini mashq qilayotgan ijodiy to‘garak a’zolari bilan suhbatlashib, ularning mashqlarini tinglab, erinmasdan o‘z tavsiyalarini berishdi.
Ayniqsa, SamDU Kattaqo‘rg‘on filialining “Mushoira”, “Yosh ijodkorlar” to‘garagi a’zolari bo‘lgan talabalarimiz hamda Aziz Said, Dilshod Rajab, Orif To‘xtashning ijodiy muloqoti juda qizg‘in kechdi. Talabalarimiz ijod namunalari bilan bevosita tanishishdi, o‘zlarining fikrnomalarini qoldirishdi. Eng muhimi, ustoz-shogirdlik aloqalari bog‘landi.
Bundan, albatta, ijod olamiga kirib kelayotgan murg‘ak qalblarda o‘z-o‘ziga ishonch shakllandi, dadillikni his qilishdi.
Eng muhimi bizga mehmon bo‘lib kelgan ijodkorlarimiz bilan endilikda doimiy aloqa, hamkorlik o‘rnatildi. Kelgusida xuddi shunday ijodiy uchrashuvlarni birgalikda tashkil qilishga kelishib oldik.
Shu nuqtayi nazardan xalqimizni, ayniqsa, yoshlarimizni ma’naviyatli, ma’rifatli qilish ishida bosh-qosh bo‘lib turgan muhtaram Prezidentimizdan, shu ezgu loyihaga o‘z hissasini qo‘shib turgan barcha rahbarlarimizdan minnatdor ekanligimizni ta’kidlamoqchiman.
Shomurod Normo‘minovich Mustafayev,
SamDU Kattaqo‘rg‘on filiali direktorining birinchi o‘rinbosari.