Korrupsiya so‘nggi yillarda xalqaro miqyosda transmilliy jinoyat sifatida keng muhokama qilinayotgan mavzulardan biridir. Mamlakatimizda korrupsiyaga qarshi kurashish hamda ushbu turdagi jinoyatlarni sodir etilishining oldini olishga qaratilgan kompleks chora-tadbirlar tizimli ravishda amalga oshirilmoqda.
Prezidentimizning 2021-yil 6-iyuldagi PQ-5177-son “Korrupsiyaga qarshi kurashish faoliyatini samarali tashkil etishga doir qo’shimcha chora-tadbirlar to‘g‘risida”gi qarori ijrosini ta’minlash va yoshlarda “Halollik vaksinasi” tushunchasini singdirish maqsadida Samarqand davlat universiteti Kattaqo’rg’on filiali Biznesni boshqarish va axborot texnologiyalari fakultetida “Biz korrupsiyaga qarshimiz” shiori ostida tadbir tashkil qilindi.
Tadbirda Kattaqo’rg’on shahar prokurori yordamchisi J.Mardanov, Yoshlar masalalari va ma’naviy-ma’rifiy ishlar boʻyicha direktor oʻrinbosari Sh.Mustafayev,direktor maslahatchisi S.Eshonqulov, va 60 nafar talabalar ishtirok etdi.
Biznesni boshqarish va axborot texnologiyalari fakulteti dekani S. Rajabov kirish so’zi bilan ochib berdi.
Kattaqo’rg’on shahar prokurori yordamchisi J.Mardanov o’z nutqida korrupsiyaga qarshi kurashishning asosiy prinsiplari sifatida qonuniylik, fuqarolar huquqlari, erkinliklari va qonuniy manfaatlarining ustuvorligi, ochiqlik va shaffoflik, tizimlilik, davlat va fuqarolik jamiyatining hamkorligi, korrupsiyaning oldini olishga doir chora-tadbirlar ustuvorligi, javobgarlikning muqarrarligi to‘g‘risida batafsil ma’lumotlar berdi.Shuningdek, O‘zbekiston Respublikasida korrupsiyaga qarshi kurashishga qaratilgan ko‘plab normativ-huquqiy hujjatlar qabul qilingani, xususan, “Korrupsiyaga qarshi kurashish to‘g‘risida”gi qonunlar shular jumlasidan ekanligi haqida a’lohida to’xtalib o’tdi..
Shundan so’ng, Direktor maslahatchisi S.Eshonqulov korrupsiyaga qarshi kurashish va uning oldini olish korrupsiyaga oid huquqbuzarliklarni oʻz vaqtida aniqlash, ularga chek qoʻyish, ularning oqibatlarini, imkon beruvchi sabablar va shart-sharoitlarni bartaraf etish, korrupsiyaga oid huquqbuzarliklarni sodir etganlik uchun javobgarlikning muqarrarligi borasida ma’lumot berdi. Shuningdek, Jinoyat kodeksining 210-, 211- va 212-moddalarida aynan korrupsiya bilan bogʻliq jinoyatlar uchun javobgarliklar koʻzda tutilganligi haqida talabalarga tushuncha berdi.
Yigʻilish so’ngida Yoshlar masalalari va ma’naviy-ma’rifiy ishlar boʻyicha direktor oʻrinbosari Sh.Mustafayev, talabalarga tamagirlik illatlariga aralashmasliklari hamda odob-ahloq qoidalariga qatʼiy rioya qilishlari boʻyicha tushuntirishlar berdi.
Ochiq muloqot tarzida o’tgan ushbu tadbirda mutasaddilar tomonidan talabalarni qiziqtirgan barcha savollarga batafsil javob berildi hamda ularning korrupsiyani barvaqt oldini olishga qaratilgan chora tadbirlar yuzasidan taklif hamda tavsiyalar berildi.
Eslatib oʻtamiz, korrupsiya holatlari @Samdukf_hemis_yordam_ bot faoliyati yoʻlga qoʻyilgan, bundan tashqari @Samdukf_hemis_yordam_bot orqali murojaat qilishish imkoni mavjud.
