Azaldan xalqimizda keksa avlod vakillari yuksak hurmat va ehtiromda bo‘lganlar. To‘y-hashamlar, mahallalardagi barcha tadbirlar nuroniylar ishtirokida ularning maslahatlari bilan amalga oshirilgan.
Zero, keksalar oilalar tinchligi va totuvligini ta’minlash, yosh avlodni tarbiyalashda, mahallalarda sog‘lom ma’naviy muhitni shakllantirishda muhim o‘rin egallaydi.
Shu boisdan mamlakatimizda keksa avlod vakillarini qo‘llab-quvvatlash borasidagi tadbirlar doirasida nuroniylar ishtirokida davra suhbatlari, uch avlod uchrashuvlarini o‘tkazilishiga alohida e’tibor qaratilgan.
Bugun Samarqand Davlat universitetining Kattaqo‘rg‘on filialida tashkil qilingan “Uch avlod uchrashuvi” ham juda samimiy ruhda bo‘lib o‘tdi.
Shahrimizdagi turli sohalarda faoliyat yuritgan ayni damda o‘zlarining maslahatlari, hayotiy tajribalari bilan yoshlarga o‘rnak bo‘lib kelayotgan bir guruh faxriylar ishtirokidagi tadbirni filial direktori Sherzod Uroqov ochib berdi.
Shundan so‘ng so‘zga chiqqan shahar hokimi o‘rinbosari Jamshid Nosirov tadbir ishtirokchilarini tanishtirar ekan tarix, bugun va kelajakni birlashtirgan mana shunday uchrashuvlarning o‘tkazilishi katta avlodning jamiyat, oilalar va mahallalarda tinchlik va osoyishtalikni ta’minlash hamda yosh avlodni xalqimizning ko‘p asrlik an’analariga sadoqat ruhida tarbiyalashdagi rolini kuchaytirishdagi ahamiyati katta ekanligini ta’kidladi.
Shuningdek, tadbirda so‘z olganlar o‘zlarining hayotiy tajribalari bilan o‘rtoqlashdilar.
Shoira va jurnalist Fazilat Abdullayevaning she’rlarini, mehnat faxriysi Baxriddin Shomamatovning, “Kattaqo‘rg‘on tongi” gazetasida faoliyat yuritayotgan Hamidullo Hushaqovning hayot chizgilarini yoshlar katta qiziqish bilan qarshi oldilar.
Tadbirga ajoyib kuy va qo‘shiqlar ko‘tarinkilik bag‘ishladi.
Uchrashuv yakunida faxriylar va talabalar ishtirokida filial hovlisiga archa ko‘chatlari o‘tqazildi.
