Bugun shahar Drama teatrida “O‘zbekistonda el aziz, inson aziz” bosh g‘oyasi asosida “Ustozlar milliy forumi” bo‘lib o‘tdi.
Unda shahar hokimi G.Alimova, viloyat hokimining ta’lim bo‘yicha maslahatchisi S.Usmonov hamda shahar Xalq ta’limi xodimlari, faxriy pedagoglar ishtirok etdilar.
Davlatimiz madhiyasi bilan boshlangan tadbirni shahar Xalq ta’limi bo‘limi mudiri J.Axmedov ochib berdi.
Shundan so‘ng so‘zga chiqqan shahar hokimi G.Alimova shahar xalq ta’limi tizimida o‘tgan o‘quv yili davomida erishilgan natijalar va kelgusidagi rejalar haqida so‘z yuritdi.
-Kattaqo‘rg‘on shahridagi mavjud 17 ta umumiy o‘rta ta’lim maktablarida mehnat qilib kelayotgan 947 nafardan ortiq o‘qituvchi-xodimlar ham o‘z navbatida yosh avlodga zamon talablari asosida yuqori darajali bilim berish, ularni kelgusida xalqimiz, davlatimiz ravnaqi yo‘lida mehnat qiladigan insonlar qilib tarbiyalashda o‘z hissalarini qo‘shib kelishmoqda.
Shular qatorida uzoq yillik samarali mehnatlari davlatimiz rahbari tomonidan munosib taqdirlangan “O‘zbekiston xalq o‘qituvchisi” unvoni sohibi, 11-IDUM fizika fani o‘qituvchisi Imomova Sayyora opaning, “Xalq ta’limi fidoyisi” ko‘krak nishoni bilan taqdirlargan 4-umumta’lim maktab rus tili fan o‘qituvchisi Nilufar Turdiyevaning yutuqlarini alohida e’tirof etmoqchiman.
Bundan tashqari, 2021-yilda “Xalq ta’limi a’lochisi” ko‘krak nishoni bilan taqdirlangan mehnatsevar, fidoyi o‘qituvchilarimizdan 11-IDUM o‘quv ishlari bo‘yicha direktor o‘rinbosari Gulmira Boboyeva, 9-umumta’lim boshlang‘ich sinf o‘qituvchisi Shaxnoza Nazarova,16-IDUM direktori Matluba Bozorova, 12-maktab biologiya fan o‘qituvchisi Dilbar Otamurodova va shu maktabning matematika fan o‘qituvchisi O‘g‘iloy Abdiyevalarning mehnatlari tahsinga loyiqdir,- dedi hokim o‘z ma’ruzasida.
Ta’lim tizimida erishilgan ko‘pgina muvaffaqiyatlar bilan birga fan olimpiadalari va nufuzli tanlovlarda o‘quvchilarimizning g‘oliblar safida bo‘lmaganligini qayd etgan G.Alimova yangi o‘quv yilida o‘qituvchi va pedagoglarning o‘z imkoniyatlaridan foydalanib, yosh avlod vakillarining qobiliyatlarini o‘rganib, ularga zamon talablari asosida puxta va sifatli bilim berishga, ularda g‘urur va iftihor hislarini singdirish ishlarini sidqidildan ado etishlariga ishonch bildirdi va o‘quvchisi “Zulfiya” nomidagi Davlat mukofotini qo‘lga kiritgan o‘qituvchini 50 million so‘m pul mukofoti bilan taqdirlashini ta’kidladi.
Shahar xalq ta’limi tizimida erishilayotgan muvaffaqiyatlarda sohada xizmat qilayotgan fidoyi ustozlarning mehnatlari beqiyos. Forum davomida o‘zining samarali mehnatlari bilan yosh avlodga ta’lim-tarbiya berishda o‘rnak bo‘layotgan ana shunday ustozlarning mehnatlari e’tirof etildi hamda diplom va esdalik sovg‘alari bilan taqdirlandilar.
Tadbirda so‘z olgan shahar Xalq ta’limi bo‘limi mudiri J.Axmedov o‘z ma’ruzasida xalq ta’limi tizimidagi islohotlar va 2022-2023 o‘quv yilida ta’lim muassasalari rahbarlari oldida turgan muhim vazifalarga to‘xtaldi.
Forumda so‘z olgan viloyat hokimining ta’lim bo‘yicha maslahatchisi S.Usmonov forum ishtirokchilari bo‘lgan pedagoglarning aksariyati yoshlardan iboratligini ko‘rib xursand bo‘lganligini, bu albatta yosh kadrlarni qo‘llab-quvvatlashning isboti ekanligini aytdi va kelgusida mana shu iqtidorli va iste’dodli, pedagoglar, faxriy ustozlarning tajribalaridan foydalangan holda shahar xalq ta’limi bo‘yicha reytingda yuqori o‘rinlarni egallashi lozimligini ta’kidladi va soha xodimlarining bu boradagi ishlariga muvaffaqiyat tiladi.
Shuningdek, forum ishtirokchilari SamDU Kattaqo‘rg‘on filiali direktori SH.Urakov, 12 umumta’lim maktabi o‘qituvchisi D.Otamurodovalarning ma’ruzalarini tingladilar.
Xalq ta’limi tizimidagi muvaffaqiyatlarda sportdagi yutuqlarning alohida o‘rni bor.
Forumda o‘tgan o‘quv yili davomida “Umid nihollari” musobaqasida yuqori o‘rinlarni egallagan o‘quvchi yoshlarga tashakkurnoma va esdalik sovg‘alari taqdim etildi.
