Ассалому-алайкум қадрли юртдошлар!
Ҳурматли профессор-ўқитувчилар, азиз талабалар!
Сизларни кириб келаётган янги 2022 йил билан табриклайман.
Аввало, сиҳат-саломатлик, тинчлик-хотиржамлик, ишларингизга омад тилайман.
Тарихга айланаётган 2021 йилимиз Ватанимиз тақдирида, халқимиз ҳаётида янгиланишлар, ўзгаришлар, юксалишлар йили бўлди.
Хусусан, ушбу йилда мамлакатимиз ижтимоий-сиёсий ҳаётида муҳим воқеа – Президент сайлови ўтказилди. Муҳтарам Шавкат Мирзиёев Ўзбекистон Республикаси Президенти лавозимига сайланди. Халқимиз ишончига, меҳрига, ҳурматига сазовор бўлди.
Ўтаётган йил университетимиз учун ҳам ҳақиқий маънода самарали ва омадли йил бўлди. Самарқанд давлат университетининг Ўзбекистон-Финляндия педагогика институти ҳамда Каттақўрғон филиалининг очилиши олий таълим соҳасида олиб борилаётган ислоҳотларнинг улкан натижасидир. Шунингдек, университетимизга молиявий мустақиллик берилганини ҳам алоҳида таъкидлашни истайман.
2021 йилда Самарқанд давлат университети илмий ходимларидан 11 нафари докторлик (DsC), 67 нафари фалсафа доктори диссертацияларини (PhD) ҳимоя қилди. Олимларимизнинг 58 монографияси, шундан, 8 монография Германия, Россия ва Туркияда нашр қилинган, 1350 дан зиёд илмий мақоладан 816 таси чет эл, 116 таси Scopus базасидаги журналларда чоп этилди. Халқаро анжуманлар, симпоизумлар ўтказилди. Ўнга яқин чет мамлакатларнинг элчилари университетимизга ташриф буюрди. Нобель мукофоти лауреати Азиз Санжар тарихда биринчи марта ўтказилган “21 сентябрь – Самарқанд давлат университети куни” да иштирок этди…
Самарқанд давлат университетининг 2-курс талабаси Парвина Самандарова “Токио-2020” Паралимпия ўйинларида иштирок этиб, кумуш медални қўлга киритди.
Университетимиз делегацияси Туркиянинг Анқара шаҳрида ўтказилган “Ўзбекистоннинг ўтмиши ва бугуни” халқаро симпозиумида иштирок этиб, ушбу мамлакатнинг олий ўқув юртлари билан ҳамкорлик алоқалари ўрнатди.
Янги 2022 йил университетимиз учун янада муҳим ва масъулиятли йил бўлишига ишонаман.
Мен янги йилда барчангизга оилавий бахт, янги муваффақият ҳамда куч-қувват тилайман.
Ушбу йил Сиз ва яқинларингиз учун янгиликларга бой бўлсин. Яратган Эгам халқимизни паноҳида асрасин.
Янги йилингиз муборак бўлсин!