fbpx

Oliy ta’lim, fan va innovatsiyalar vaziri I.Abdurahmonovning yoshlar bilan navbatdagi uchrashuvi O‘zbekiston davlat san’at va madaniyat institutida tashkil etildi.

Dastlab vazir institutda ham faoliyati yo‘lga qo‘yilgan talabalarni turar joy bilan ta’minlash markazi bilan tanishdi. Shuningdek, belgilangan vazifalarni o‘z vaqtida va sifatli bajarish, talabalarning turar joy bilan bog‘liq barcha masalalarini tezkorlik bilan hal qilish borasida tegishli tavsiyalar berildi.

Shundan so‘ng, vazir I.Abdurahmonov yoshlar bilan uchrashib, samimiy muloqotda bo‘ldi.

“O‘tgan davr mobaynida sizlarni kasb-hunar egallashingiz, til o‘rganib, ilm olish orqali jamiyatda o‘z o‘rningizga ega bo‘lishingizda vazirlik jamoasi bilan oz bo‘lsada hissa qo‘sha olayotganimizdan xursandmiz”, – deydi vazir.

Uchrashuv davomida yoshlarning fikr-mulohazalari eshitilib, ularning kelgusidagi rejalari va duch kelgan muammolarini yechishda doimiy yordam berilishi ta’kidlandi.

Uchrashuv so‘ngida O‘zbekiston va Qoraqalpog‘iston xalq artisti, professor Muhammadali Abduqunduzov badiiy rahbarligida sahnalashtirilgan, jadid ajdodimiz Cho‘lpon hayotiga bag‘ishlangan O’zbekiston xalq shoiri Usmon Azim qalamiga mansub “Kunduzsiz kechalar” spektaklining namoyishi bo‘lib o‘tdi.

Institut talabalari tomonidan mahorat bilan ijro etilgan asar yig‘ilganlarga iliq taassurot qoldirdi.

Tadbir yakunida yoshlarga vazirning esdalik sovg‘alari ham topshirildi.