SOHIBQIRON АMIR TEMURGА EHTIROM
Sharof Rashidov nomidagi Samarqand Davlat universitetining Kattaqoʼrgʼon filialida Sohibqiron Аmir Temur tavalludining 686 yilligi munosabati bilan “Sohibqiron Аmir Temurning ibratli umri” mavzusida maʼnaviy-maʼrifiy tadbir boʼlib oʼtdi
Maʼlumki, har yili 9-aprel kuni Аmir Temurning tavvalud sanasi yurtimizda katta tantanalar bilan nishonlanadi. Shu munosabat bilan SamDU Kattaqoʼrgʼon filialida oʼtkazilgan maʼnaviy-maʼrifiy tadbir oʼqituvchi va talabalarda katta qiziqish uygʼotdi. Samimiy va savol-javoblar tarzida oʼtkazilgan muloqotni Yozuvchilar uyushmasi viloyat boʼlimi rahbari, shoir va publitsist Toshpoʼlat Tugalov olib bordi.
SamDU professori, yuridik fanlari doktori Ziyodulla Muqimov, Xalqaro Аmir Temur jamoat fondi Samarqand viloyat boʼlimi rahbari professor Qoʼziboy Mamarahimov, Аmir Temur shaxsi va uning jangovor faoliyatining oʼziga xosligi, bobomizning oʼzbek davlatchiligi tarixida tutgan oʼrni, dunyoga mashhur Temur tuzuklarining yosh avlod taʼlim taribiyasidagi ahamiyati haqida so’z yuritdi.
Oʼzbekiston Yozuvchilar uyushmasi viloyat boʼlimi rahbari Toshpoʼlat Tugalov soʼzga chiqib yosh avlod uchun davlatimiz rahbari va hukumatimiz tomonidan yaratilayotgan shart-sharoitlar, koʼrsatilayotgan gʼamxoʼrliklar borasida oʼz mulohazalarini bildirdi. Аmir Temur hazratlarining hayoti va jangovor faoliyatini oʼrganish va ulugʼ bobolarimiz bilan faxrlanish , ulardan oʼrnak olib vatanparvarlik, mardlik va sadoqat tuygʼusini yuksak maqomda tutish zarurligi haqida toʼxtaldi. Shoir yigʼilganlarni milliy bayramimiz- Navroʼz bilan tabriklab, yangi sheʼrlaridan namunalar oʼqidi.
Bir soʼz bilan aytganda, Аmir Temurning bunyodkorlik faoliyati, uning atoqli davlat arbobi, yengilmas sarkarda, mohir siyosatchi, iqtidorli meʼmor, huquqshunos va islohotchi sifatidagi ishlari tahsinga sazovor. Uning sharofati bilan Movarounnahr hududida kuchli markazlashgan davlat barpo etilib, ilm-fan, sanʼat va arxitektura mislsiz taraqqiy etdi.
Shuningdek, Sohibqiron nafaqat oʼz davridagi eng qudratli davlat asoschisi, ilm-fan, madaniyat va maʼnaviyat homiysi, balki Osiyo va Yevropa qitʼalarida roʼy bergan tarixiy oʼzgarishlarga hal qiluvchi taʼsir koʼrsatib, jahon sivilizatsiyasiga beqiyos hissa qoʼshgan shaxs hamdir.
Ochiq muloqot tarzida kechgan tadbirda talabalar tomonidan berilgan savollarga mehmonlar javob berishdi. Oʼzbekiston Yozuvchilar uyushmasi viloyat boʼlimi rahbari Toshpoʼlat Tugalov “Samarqand mushoirasi” nomli sheʼrlar toʼplami, “Ijod yoʼli” gazetasining yangi sonlarini, professor Ziyodulla Muqimov esa Temur haqida yozgan asarlarini faol talabalar hamda filial kutubxonasiga sovgʼa qilishdi.
Tadbir yakunida filialning Yoshlar ishlari va maʼnaviy-marifiy masalalar boʼyicha direktor oʼrinbosari Shomurod Mustafoev mehmonlarga sermazmun tadbir va talabalarga sohibqiron Аmir Temur haqida foydali va kerakli maʼlumotlar berganligi uchun oʼz minatdorchiligini bildirdi.
Taʼkidlash joizki, bu kabi maʼrifiy tadbirlar yosh avlodning tariximizga oid bilimini boyitish, ulugʼ bobolarimiz siymosiga hurmat-ehtiromini yanada yuksaltiradi.
SamDU KF axborot xizmati