SamDU Kattaqo’rg’on filiali direktori Urakov Sherzod Rahmonovichning bayram tabrigi!
Assalomu alaykum, munis va mo’tabar opa-singillar, qadrli qizlarimiz!
Go’zal bahor faslining farog’atbaxsh mana shunday damlarida barchalaringizni 8 mart — Xalqaro xotin-qizlar kuni bilan Samarqand davlat universiteti Kattaqo’rg’on filiali nomidan samimiy muborakbod etaman!
Barchangizga o’zimning eng ezgu va samimiy tilaklarimni bildirib, hamisha oilangiz va yaqinlaringiz, el-yurtimiz ardog’ida bo’lish baxtini tilayman.
E’tirof etish joizki, keyingi besh yilda xotin-qizlar va erkaklar uchun teng huquq hamda imkoniyatlarga erishish, jamiyat va davlat ishlarini boshqarishda ularning teng ishtirok etishini ta’minlash, xotin-qizlarni ijtimoiy-huquqiy jihatdan qo’llab-quvvatlash, shuningdek, ularni tazyiq va zo’ravonliklardan himoya qilishga qaratilgan keng ko’lamli islohotlar amalga oshirildi.
Gender tenglik masalasi davlat siyosati darajasiga ko’tarilib, sohaga oid o’ttizga yaqin qonunchilik hujjati qabul qilindi.
O’zbekiston Respublikasining Gender tenglikni ta’minlash masalalari bo’yicha komissiyasi, O’zbekiston Respublikasi Oliy Majlisi Senatida Xotin-qizlar va gender tenglik masalalari qo’mitasi tashkil etildi.
Bahorning ilk kuni — 1 mart sanasida Prezidentimiz xotin-qizlarimizga yanada ko’proq ehtirom ko’rsatish, ularning oilada, jamiyatda, mehnat faoliyatida, ta’lim-tarbiyasida hamda butunlay hayotimizdagi mavqyeyini yanada oshirish borasida o’z taklif va tashabbuslarini bildirdi. Ushbu yo’nalishdagi islohotlar ko’lamini kengaytirish, muhim huquqiy asoslarni yaratish bo’yicha topshiriqlar berdi.
Darhaqiqat, bugungi kunda Samarqand davlat universiteti Kattaqo’rg’on filialida qirq nafardan ziyod ayol professor-o’qituvchilar hamda ishchi-xodimlar faoliyat olib bormoqda.
Endigina tashkil qilingan filialimiz ilmiy salohiyatini rivojlantirish, talabalarimizni ilm-ma’rifatli qilib tarbiyalashda ularning munosib hissasi bor.
Filialimizda 440 nafar talaba qizlarimiz tahsil olmoqda. Ularning ilmga chanqoqligi, zukkoligi va iqtidori tahsinga sazovor. Ayniqsa, filologiya va tillarni o’qitish: o’zbek tili yo’nalishi talabasi Umida Mustafoqulovaning Mustaqil davlatlar hamdo’stligi miqyosida yosh ilmiy izlanuvchilar o’rtasida o’tkazilgan “Eng yaxshi ilmiy tadqiqotchi” ko’rik-tanlovida g’oliblikni qo’lg’a kiritgani, sport faoliyati (kurash) yo’nalishi talabasi Mashhura Sunnatillayevaning Jizzax shahrida belbog’li kurash sport turi bo’yicha o’tkazilgan jahon chempionatida bronza medal sohibasi bo’lgani va shu kabi qizlarimizning erishayotgan yutuqlari diqqatga sazovor.
Fursatdan foydalanib, yurtimizdagi barcha aziz onalarimizni, opa-singillarimizni, filialimizning har bir ayol professor-o’qituvchilari, ishchi-xodimlari hamda talaba qizlarimizni 8 mart — Xalqaro xotin-qizlar kuni bilan tabriklayman!
Sizlarga mustahkam sog’lik, oilaviy xotirjamlik tilayman! Yuzingizdan tabassum arimasin! Baxt va omad hamisha yor bo’lsin!
Hurmat bilan,
Urakov Sherzod Rahmonovich,
Samarqand davlat universiteti Kattaqo’rg’on filiali direktori.