fbpx

Foto: Xalq so‘zi

Vazirlar Mahkamasining 2021 yil 18 maydagi qarori bilan 2021-2022 o‘quv yilidan Samarqand davlat universitetining Kattaqo‘rg‘on filiali faoliyati yo‘lga qo‘yilgan edi.

O‘tgan yilda filialda 11 ta ta’lim yo‘nalishida 703 nafar talaba ilm olgan bo‘lsa, mazkur o‘quv yilida 12 ta ta’lim yo‘nalishiga 481 nafar talaba qabul qilindi.

Samarqand davlat universiteti filialining ilmiy salohiyatini oshirib borish bo‘yicha ham qator chora-tadbirlar amalga oshirilmoqda. Jumladan, 2021 yilda maqsadli doktoranturaga 5 nafar tayanch doktorantlar qabul qilingan bo‘lsa, joriy yilda bu ko‘rsatkich 12 nafarga yetkazilishi ko‘zda tutilgan.

Quvonarlisi, 2022-2023 o‘quv yili boshlanishi oldidan filialning yangi binosi foydalanishga topshirildi. 1000 o‘rinli muassasa mukammal ta’mirlanib, 31 ta o‘quv xonasi, kutubxona, tadbirlar o‘tkaziladigan zal hamda sport zali kerakli jihozlar va vositalar bilan ta’minlandi.

Shuningdek, investitsiya dasturlari doirasida 500 o‘rinli talabalar yotoqxonasi qurilishi ham jadal sur’atlar bilan davom ettirilmoqda.

— Filialning moddiy-texnik bazasini rivojlantirish, o‘quv adabiyotlar bilan ta’minlash bo‘yicha universitetning amaliy yordami ko‘rsatilmoqda. Xususan, shu kunga qadar 72 nomdagi 1000 dan ortiq darslik va o‘quv qo‘llanmalar bilan ta’minlanib, yangi ochilgan yo‘nalishlar uchun zamonaviy adabiyotlar yaratish tizimli yo‘lga qo‘yilgan, — deydi SamDU Kattaqo‘rg‘on filiali pedagogika va tillarni o‘qitish fakulteti dekani Anvar Sobirov. — Bugungi kunda filialda professor-o‘qituvchilar 56 nafarni tashkil etib, 2021-2022 o‘quv yilida ular tomonidan xalqaro ilmiy-texnik bazalarga kiruvchi jurnallarda 11 ta, xalqaro miqyosidagi jurnallarda 65 ta, respublika jurnallarida 160 dan ortiq maqola, xalqaro ilmiy amaliy konferensiyalarda 60 dan ziyod tezislar chop etildi.

O‘ylaymizki, filial binosining ta’mirdan chiqarilib, zamonaviy ko‘rinishga keltirilganligi, ta’lim sifatini yanada takomillashtirish, zamonaviy mutaxassislar tayyorlashga zamin yaratadi.