OILA NIZOMSIZ BO‘LSA, UNING YOMON OQIBATI BUTUN MILLATGA TA’SIR QILADI
Xalqimizda azaldan oilaga muqaddas bir dargoh sifatida qaralgan. Sharqda oila kichik bir Vatan timsolida e’zozlangan. Millat kelajagi bo‘lmish yosh avlodning, buyuk daholaru mutafakkirlar, yirik davlat arboblarining ham aynan Oilada kamol topishi, tarbiyalanishi ham Oila muqaddasligining isbotidir.
Farzandlarni ma’nan va jismonan barkamol bo‘lib voyaga yetishlari esa, eng avvalo, oiladagi tarbiyaga bog‘liq. Mutafakkirlarimiz ta’kidlaganidek, bordi-yu oila tuzuk bo‘lmasa, tarbiyaga e’tibor berilmasa, qancha buyuk bo‘lsa ham, bunday millat dunyoda uzoq yashay olmaydi. Zero ota-onaning burchi faqat farzandni dunyoga keltirganligi bilan emas, balki yaxshi farzand tarbiyalagani bilan ham belgilanadi.
Agar oilada mo‘ayyan tartib-qoida bo‘lmasa yoki unga amal qilinmasa oilaviy munosabatlarning darz ketishi shubhasiz. Oilalardagi muvozanatning buzilishi nafaqat oilani barbod bo‘lishiga, balki jamiyatning ham tanazzulga yuz tutishiga sabab bo‘lishi mumkin.
Bugun shahar hokimi tashabbusi bilan ishlab chiqilgan Kattaqo‘rg‘on tajribasi sifatida oilalardagi munosabatlarni tartibga solishda muhim ahamiyat kasb etadigan tavsiyalar o‘rin olgan Oilaning namunaviy nizomi loyihasi muhokamasida bu boradagi fikr va mulohazalar ilgari surildi.
Samarqand Davlat universiteti Kattaqo‘rg‘on filialida o‘tkazilgan davra suhbatida shahar hokimi Gavhar Alimova, “Oqila ayollar” harakati a’zolari, shahar faollari, universitet o‘qituvchilari ishtirok etdilar.
Dastlab, so‘z olgan shahar hokimi Gavhar Alimova oilaning jamiyatdagi o‘rni va ahamiyati xususida so‘z yuritdi. Har bir oilada tartib va intizom bo‘lishi va oila a’zolari a’zosi o‘z burchi va majburiyatlarini chuqur his qilishi va unga amal qilishi lozim. Zero, donishmandlarimiz ham bu borada “Millatlar sharafini yuqori martabaga ko‘taradigan narsa millionlar ila sanaladigan askarlar-u, dunyoda eng buyuk va zo‘r bo‘lgan kemalar emas, balki eng oz e’tibor beradiganimiz yo bo‘lmasa, hech bir zamon e’tibor bermasdan qoldirganimiz-oiladir.
Oila nizomsiz bo‘lsa, uning yomon oqibati butun millatga ta’sir etadi va shu sababdan fazilat yeriga razolat, taraqqiyot o‘rniga tubanlik negiz quradi… Agar bir millatga bunday hol ro‘baru kelsa, u millat kitobining so‘nggi varag‘i ochiladi…”, -deya ta’kidlaganlar. Ushbu fikrlar meni doim o‘ylantirib kelgan. Haqiqatdan ham bugun ayrim oilalardagi o‘zaro kelishmovchiliklar, oqibatida esa ajrimlar aynan er va xotinning o‘z huquq va majburiyatlarini yaxshi bilmasligi yoki unga amal qilmasligi, ayrim oila boshliqlarini masuliyatni his qilmasligi, oilaga boshqa shaxslar aralashuvi, oilada oriyat degan tushunchaga e’tiborsizlik, oilaning ziynati bo‘lgan ayollarning tarbiya borasida xatoliklarga yo‘l qo‘yayotgani kabi bir qator illatlar sabab bo‘layotgani sir emas. Xalqimizda yoshlarni turmush qurishidan oldin oilalar bir-biriga mosligini o‘rganish, so‘rab surishtirish lozim- deb bekorga aytilmaganku.
Xalqimiz donishmandlarining yuqoridagi fikrlaridan kelib chiqib, har bir oilada oilalarni mustahkamlovchi, oilada erning, otalarning o‘rnini bildiruvchi, ayolning rafiqalik, onalik, qaynonalik mas’uliyatini his qildirib turadigan, farzandlarning burch va majburiyatlari aks etgan tavsiyalardan iborat bo‘lgan Oilaning namunaviy nizomi bo‘lishi kerak, – deya ta’kidladi shahar hokimi.
Oilaning namunaviy nizomi loyihasi bo‘yicha ishtirokchilar o‘z fikr- mulohazalarini bildirdilar.
