fbpx
Mana 31 yildirki 1991 yil 18 noyabr Mustaqilligimiz ramzlaridan biri bo‘lgan O‘zbekiston Respublikasining Davlat bayrog‘i qabul qilingan kun milliy iftixorimiz sifatida katta tantana bilan nishonlanadi.

Bugun Kattaqo‘rg‘on shahrida ham ushbu qutlug‘ sana munosabati bilan bayram tadbiri bo‘lib o‘tdi.

Shahar hokimligi oldida “Muqaddasdir Vatan bayrog‘i!” shiori ostida o‘tkazilgan tadbirda shahrimizdagi idora va tashkilotlar, yoshlar, ijodkorlar, keng jamoatchilik vakillari ishtirok etdilar.

Bayram tadbiri Davlatimiz madhiyasi bilan boshlandi.

Shundan so‘ng shahar hokimining o‘rinbosari Jamshid Nosirov shahar hokimining bayram tabrigini o‘qib eshittirdi.

-Davlat bayrog‘i – davlat suverenitetining ramzi hisoblanib, u yer yuzining shu sarhadlarida mustaqil O‘zbekiston davlati borligini anglatadi va o‘zida milliy-madaniy an’analarimizni mujassamlashtiradi. Vatanimiz bayrog‘i shuning bilan ham ahamiyatlidir. O‘zbekiston bayrog‘i timsollar tilida bu – yaxshilikni, donishmandlikni, halollikni, tinchliksevarlikni, beg‘uborlik va soflikni, orzular tozaligi va ichki go‘zallikka intiluvchanlikni, navqironlik va umidlilikni, tabiat bilan uyg‘un yangilanib borishni bildiradi.

Milliy bayrog‘imizning hilpirab turishi, turli bayram va tantanalarda, mamlakatimiz vakillari qatnashayotgan xalqaro miqyosdagi siyosiy, madaniy-ma’rifiy tadbirlarda, nufuzli sport musobaqalarida Vatanimizning sha’ni, xalqimizning g‘ururini yorqin aks ettirishi barchamizga iftixor baxsh etadi.

Mustaqil davlatimiz bayrog‘i tinch va osoyishta, ozod hamda erkin hayotimiz, yorug‘ kelajagimizga bo‘lgan ishonchimiz timsolidir. Davlat ramzlarining muqaddasligini, ular bizga yurt manfaati har nedan ustunligini anglatib, eslatib turishini har birimiz yodda tutishimiz shart.

Shahar Drama teatri aktyorlarining sahna ko‘rinishlari tadbir ishtirokchilari olqishiga sazovor bo‘ldi.

Kuy va qo‘shiqlar ostida davom etgan tadbirga shahar madaniyat bo‘limi xonandalarining hamda o‘quvchi-yoshlarning chiqishlari ko‘tarinkilik bag‘ishladi.

Tadbir yakunida yurtimiz bayrog‘lari ostidagi mashinalar karvoni shahar bo‘ylab yo‘l oldi.

Bugun shahrimizdagi barcha ta’lim muassasalarida, tashkilotlarda O‘zbekiston Respublikasi Davlat bayrog‘i qabul qilinganligining 31 yilligi munosabati bilan “Muqaddasdir vatan bayrog‘i!” shiori ostida bayram tadbirlari o‘tkaziladi.