Ma’lumki, mamlakatimizda 2001 yildan buyon 31 avgust – Qatag‘on qurbonlari xotirasini yod etish kuni sifatida keng nishonlanadi. Viloyatimizda ham ushbu sana munosabati bilan qator tadbirlar o‘tkazilmoqda. Jumladan, Samarqand davlat universiteti tuzilmasidagi viloyat Qatag‘on qurbonlari xotirasi muzeyida ushbu kun munosabati bilan uchrashuv o‘tkazildi. Unda Samarqand viloyatidan qatag‘on qilingan vatanparvar, ma’rifatparvar insonlarning farzandlari, nevaralari, ularning qarindoshlari, Vatanimiz tarixida mudhish iz qoldirgan qatag‘on davrini o‘rganayotgan tarixchi olimlar, yosh tadqiqotchilar, ijodkorlar ishtirok etdi. 
     Uchrashuvni muzey direktori Muzaffar Muqimov qisqacha kirish so‘zi bilan ochar ekan, muzey tashkil etilgandan buyon qisqa davr ichida uning xodimlari tomonidan viloyatimizda 4153 nafar qatag‘on qurbonlari aniqlanib, Toshkentda “O‘zbekiston” nashriyoti tomonidan nashr etiladigan “Xotira kitobi”ning 1-tomiga kiritilganligini va hali bu borada keng jamoatchilik bilan hamkorlikda izlanishlar davom etayotganini ta’kidlab o‘tdi. 

 Anjumanda so‘zga chiqqan Samarqand davlat universiteti prorektori Zebiniso Rahmonova, taniqli yozuvchi va jurnalist Nusrat Raxmat, qatag‘on qurbonlarining farzandlari  Lola Akramova, Nodir Azizov, Samarqanddagi “Ruhobod” masjidining imom-xatibi To‘lqin hoji Amirov va boshqalar viloyat Qatag‘on qurbonlari xotirasi muzeyi jamoasi tomonidan Zarafshon vohasidan qatag‘on qilingan ota-bobolarimizning tabarruk nomlarini tiklash, ular haqidagi nodir hujjatlarni, tarixiy manbalarni izlab topish borasida amalga oshirilyotgan ishlarni alohida ta’kidlab o‘tdilar.